Pour les plus jeunes

Nounours

Nounours,
c'èst m' mèyeû copin.
I doûrt avû mi.
Quand dj' é du chagrin,
on din d'vîse dins l' lit.
Bîn seûr qu'i n' pâle nî-n
mès mi, dju l' intind
èt ça m' fét du bî-n
'ne saqui qui m' comprind.

Boulome dè nîve

Èl nût' du Nowé,
tout seû a l' uch,
èl poûve boulome dè nîve
ît bleû d' froûd.

Ravisant pal fèrniète
dèl pètite cinse,
i povoût vîr ène blakeye d' feû
dins l' tchèminéye.

" Come i dwat fé doûs in d'dins! "   
pinse no p'tit boulome,
ravisant co in coup
pou vîr si l' famîye ît coukéye.

Vèl'la qu' i mèt s'mangn
su l' clikète dè l' uch,
rintrant su l' pwinte dè sès pîds…
No boulome s'èstampe pa d'vant l' tchèminéye.

Èl leûn'mangn ô matin,
du boulome dè nîve,
i n'dèmoroût pus qu'ène grosse flache d'yô.

Dins l’ bos

Dins l’ bos…
Il-a in foya.
Il-a in foya…
qu’ a ’ne grosse branke.
Su l’ grosse branke…
in moncha d’ noûjètes.
Wétèz ! In spirû
qui mindje lès noûjètes. Èyèt l’èspirû… C’èst mi !

Èl nîve

Quand du m' é l'vè timpe ô matin,
i fèsoût tout blanc dins l' djardin.
On n' vèyoût pus què l' sapinète
qui avoût mis ène bèle oupète.
Chwète ! Du va polwâr m' amûsér,
lès boules dè nîve, èles vont chîlér,
t't-aleûr in m' indalant a scole,
du va glichî dins lès rigoles.
Mès m' rève n' a nî-n durè lômint.
Tout a fondu dèssu l' tchèmin.
Djuglér din l' nîve c'èst co foutu,
ça n' sèra nî-n pou ôdjordû.