Vieillesse

Radotâdjes dè grands-pés

Di n’ sé nî-n si vos m’èrchènèz
mès mi, quand d’intind dès grand-pés
qui bèrdach’tè du tans passè,
i fôt què d’ voye lès-ascoutér.
Dèrniér’mint, dins l’ coûr dè l’ospice,
tranquîy’mint assis su in banc,
deûs vîs-omes rondjîs d’ romatisses
s’èrmémorin’tè leû djon.ne tans.
Èl pus vî s’ vantoût dè s’n-ouvrâdje
in disant ç’ qu’on lyi avoût fét fé :
rî-n qu’a l’intinde, èl kèrbènâdje
tout seû s’âroût mis a tournér.
L’ôte mèprîjoût no p’tite djon.nèsse
in lès-ap’lant dès môs al’vès
qui n’ peuv’t-in tout cas pu mô d’yèsse
dès garçons come il avoût stè.
D’avoû soupè d’ leûs sèrinètes
èyèt tout doûç’mint, d’ leû s-é dit :
« C’èst l’ moumint dè dalér vos r’mète,
pou ôdjordû, nos s’tons chèrvis
mès di r’véré in djoû ou l’ôte
vos prouvér qu’ vos n’inz nî-n réson,
què vos v’nèz d’ nos contér dès prôtes
qui sont mèt’nant woûrs dè séson ;
surtout, rapéjèz vous ’ne miyète
èt n’ moustrèz nî-n qu’ vos s’tèz d’bôchis
in v’yant qu’ inz co saquants nonjètes
mès pus nus dints… pou lès croquî !


A in grand-pé

Il-èst lon èl bon tans qu’ vos cachîz a mèmeûres
Èy’ il-èst co lon l’ cî-n qu’ vos coyîz dès godèts,
dè ç’tans la, i n’a pus què l’ souv’ni qui nos d’meûre,
c’èst què dèspûs adon, tant d’anéyes ont passè.
Il-èst co lon ètou l’ tans qu’avû vo Cat’rine,
vos-in dalîz ô bos wétî lès fwèyes ô r’viérs’,
vos vos foutîz adon dè ç’ qui, mèt’nant, vos mine,
pour vous, ç’astoût l’èstè, ôdjèrdû c’èst l’iviér’.
Ç’astoût l’ bon tans, l’amoûr vos f’soût risète,
vos rascoyîz brasséyes èt bètches a Dieu plési,
vos-astîz lon d’ sondjî què l’ tans passoût si rète
èt f’roût d’ vous ôdjèrdû in vî ome èrnési.
In coûp l’èstè passè, l’ariére séson s’amin.ne,
lès-arbes pièrd’tè leûs fwèyes, nous nos dints èt nos tch’feus ;
tout râde nos n’astons pus què l’ombrâdje dè nous minmes
èt dè l’ grande comèdîye, on-èst mis woûrs du djeu.
Èyèt l’iviér’ èst v’nu mète èl nîve su vo tièsse
èt lès r’grèts dins vo keûrs. Dè ç’qui nè r’véra pus,
l’âdje èst la qui vos dit : « L’ cî-n qu’ a stè n’ pût pus yèsse,
pèrdèz le du bon costè èyèt n’i sondjèz pus. »
Tèrtous quand on-èst vî, on r’grète sès djon.nès-anéyes,
on-avoût l’amûs’mint, l’insoucyance èt l’amoûr.
Tout ça n’ dure fok qu’in tans, fôt s’in fé in.ne idéye,
dèdja in skèpichant, on-èst candidat moûrt !!!


In wétant glichî lès-anéyes

Mès pus térès-anéyes s’invol’tè come in sondje
adon què di voûroû si bî-n lès rastèni !
Ôdjordû d’ m’in rind conte, m’ twâsième baye vî-nt d’ fini
sans avoû yeû l’ crédit d’ vîr èl preumiére arondje.

Swîvant l’ pièssinte d’èm vîye qui fét-a fét s’alondje
di va m’ kèmin tout droût, sans m’in fé pou l’av’ni.
Pa d’seûr tous les cayôs qu’on-a mis sans m’ prév’ni
di fé ’ne grande agambiéye, c’èst nî-n co ça qui m’ rondje.

Dou corâdje, tous lès djoûs, di din prind ’ne fameûse dôse.
C’èst l’ mèyeû dès-ingrès pou fé crèchî lès rôses
què d’ coye avû plési, in m’ méfiyant dès picots.

Côyî ’ne rôse !... c’èst donér dou contint’mint a l’s-ôtes,
c’èst, dou langâdje walon, fé r’djib’lér lès-écos,
c’èst rinde èl bî-n pou l’ mô !... Ça ô mwins, c’èst nî-n ’ne prôte…


Poûve tièsse…
à Monique Dussaussois

Èle mè scwat’ra, èl nwâre Fôkeûse…
après avoû wastè m’ vièyèsse
in v’nant ranch’nér come ène voleûse
dins m’ poûve tièsse…

Du carcule : « Sèroût-i l’ moumint
dè d’nér mès bî-ns » ? Ça m’ chène si bièsse !
On-a bayî tant dès tourmints
a m’ poûve tièsse…

In djon.ne mouchon cante sès fèrdènes,
lès tchamps, lès fleûrs indvint’t-ène fièsse !
Du r’mache lès vîs buchons d’èspènes
dè m’ poûve tièsse…

Mèd’cin, asprouvèz d’ m’agali…
Èl tans n’a nî-n co payî s’ dèsse
a l’èfant mér’ seû qui djurvit
dins m’ poûve tièsse…

Èt si du fé ’ne dèrniére bièstrîye,
ça s’ra d’eûlér a lès fèrnièsses
qu’on m’a scroquî dè m’ vikérîye…
D’é ’ne sote tièsse !…