Mine

Èl tèri

Il-a l’ ér’ d’ ène longue bièsse qui s’ èrpoûse al lumiére,
arî du clér’ amia, d’ sès p’tits toûts dèspardus.
Il-èst si grand d’vins l’ djoû, si wôt d’vins lès fumiéres,
qu’ i gn-a pou cwâre què l’ cièl t’t-intièr’ s’ asplouye dèssus.

Pou l’ radjon.ni, l’ avri vî-nt d’ ouvri sès fèrnièsses :
d’vins l’ solèy qui s’ alume, i s’ èrdrèsse, i crache feû,
flori come in.ne oupète, dèspûs lès pîds ‘squ’ al tièsse,
pimpant come in pâquî, musclè come in lûteû.

Pourtant, il-a couneû dès djoûs d’ pène èt d’ colére,
quand l’ grève, d’ssu lès corons, pèsoût come in muria ;
quand lès-ouvrîs d’ adon, rondjîs pa leû misére,
avin’tè pô d’ avène èt branmint trop d’ goria.

Il-a couneû l’ grisoû èt sès monvésès grôyes,
lès coûrps moûrts, pièrdus d’vins l’ fond, tout dèspok’tès,
èt lès méres ratindant ô boûrd du trô qui bôye
què l’ cache ramin.ne ô djoû leûs poûves fieus tout brûlès.

Èt pa cès swaréyes la, d’bôchî, rinfrougnant s’ tièsse,
èl tèri s’ rinvèyant d’sous l’ èstwalî mourdreû,
èyèt voûssant tous sès pus foûrt ès’ grand dos d’ bièsse,
rèvoût d’ portér l’ maleûr t’t-intiér’ a li tout seû.