Pâques

Clokes dè Rome
Henri Duval, Èl Mouchon d'Aunia, mai 1955

Clokes dè Rome

Dj’avoû si bon in stant gamin,
quand ç’astoût l’ djoû dès bonès clokes,
dè couroû cachî dins l’ djardin
lès rascoyî dins no manokes.

Avû mès seûrs èyèt mès frés,
èl vèye ô nût’, su no payasse
nos n’ fèsin’ pus què d’ bèrdèlér
dès clokes volant dins lès-èspaces.

Nos parints in’t-a pène èl’vès,
què sans fé pus d’ brût qu’ dès mouchètes,
tout parèy què lès p’tits poûcès,
nos nos-abiyin’ in muchète.

Adon ! quand no man v’noût criyî
« Alô râde ; lès clokes sont r’vènûyes ! »
come ène binde dè tchî-ns dèslachîs,
nos courin’… a k’mîche abatûye !

C’ît ô premî-n qui ariv’roût,
èy’ ô risse dè nos skètér ’ne pate,
nos sôtin’ deûs scayès d’ ô coûp,
èl minme què dès p’tits-acrobates.

Èt sans dîre bondjoû a nos djins,
tout-in criyant come dès sôvâdjes,
nos pitotin’ djusqu’ ô djardin,
pèstèlant tout, su no passâdje.

On cachoût l’ minme què dès pièrdus,
on n’ wétoût nî-n, on n’avoût cùre ;
bordùres dè pâque, plantes dè pouyù,
tout ça, astoût r’tournè d’alùre.

C’èst seûl’mint mèt’nant qu’ djè comprind,
èt ça m’a bî-n souvint ch’nu drole :
çu qui f’soût brére nos bons parints,
c’ît d’ vîr èl jwa d’ tous leûs brokgnoles !