Noël

Conte pou l’ Nowé

...C’èst s’t-in Nowé tout blanc come dins lès lîves d’ imâdjes, èl nîve come in linchû infardèle èl vilâdje qui s’ rakinquèye alintour du clokî.
L’ pètit Jésus dèl crèche triyane dins s’ tène tchèmîse, malgrè l’ tchaleûr dès candèyes qui t’t-alintour dè li brûlin’t-in s’ animant.
Al méso, l’ vint qui cache dè bîse saque pus l’ tchèminéye dès bouchéyes dè grand-pé, ‘yèt l’ feu roukèle dins l’ pot qu’in d’èst roûdje dè binés’tè.
...I fét si bon ô culot; grand-pé boure ès’ pipe in-atindant l’ dèdjunér; m’ feume, tout-in sondjant, touye èl cass’roléye dè chocolat qui boût d’ssu l’ couvièrte, léchant scapér pacoûp dès trin.néyes dè bleûsès vapeûrs qui s’inkeûr’t-ô plafond. Mi, dj’é r’pris l’ gazète d’ ayér’, ‘yèt dju r’li lès vièyès nouvèles… l’ odeûr du chocolat cakèye lès trôs dè m’ nèz. L’ Nowé pou lès grands t’t-ôssi bî-n qu’ pou lès p’tits, c’èst l’ djoû dès cougnoles, nos d-ârons in…
...Mamère! Mamére, abîye ! Il-a passè!
C’èst no gamin qui s’ rinvèye, il-a trouvè dins s’ lit lès deûs cougnoles què dj’é stè mète, tout doûç’mint d’ssu s’ n-orèyè…
...Mamére, abîye ! Qué dès grandes!
L’ mamére ôssi sote què l’ èfant grimpèye quate a quate ; què l’ chocolat s’ inkeûrt dèssu l’ èstûve, tant pîre!
...Grand-pé a r’saquî s’ pipe, in rintrant dins l’ cwîsine, c’est d’lé li què l’ gamin keûrt preumî-n, tindant sès deûs cougnoles ô d’bout d’ sès bras. L’ vî d-a lès larmes as-îs…

...L’ chocolat fumîye dins lès jates, l’ mamére rèstind l’ bûre dèssu lès cougnèts. « Alons a tâbe, dit-st-èle, n’ léchons rî-n rafwadi. » On n’ sè fét nî-n priyî, ‘yèt l’ chocolat rinte dins lès cougnoles qu’ on trimpe, come dè l’ yô dèvins in.ne èponche, lès mintons sont dècorès d’ jônès blèfes. « Eno qu’ c’èst bon! »
...L’ nîve a r ’couminchî a tchére, lès péyons s’ èspotch’tè d’ssu l’ fèrnièsse, léchant couri ‘ne grosse larme tout ô long du cârô. L’ gamin tout-in mindjant s’ cougnole a l’ ér’ dè busyî a ôte choûse. « Mamére, dit-st-i tanincoûp, c’èst-i vré què l’ pètit Jésus passe li minme lès cougnoles ?
- Bî-n seûr èno m’ pètit colô. Qui s’roût, on?
- L’ pus grand dès Dodore m’a dit ayér’ què ç’astoût vous qui…
- In non! Non! Rèspond grand-pé, c’èst l’ pètit Jésus...

L’ pètit browére n’ d-a nî-n d’mandè pus long…
L’ nîve continûwe a tchére, lès péyons sont pus gros qu’ jamés. L’ pavè tout d’ in coûp, s’ implit d’ ramâdjes… Lès quate pètits Dodore,a pîds dèscôs, a pans volants, dèssu l’ uch dè leû méso, mouss’tè leûs cougnoles al grosse marchande dè lét.
L’ tchèrète dèl cinsiére èst dèskindûye in pas pus long, lès Dodore sont rintrès, no browére achève l’ rèstant dè s’ cougnole tout-in sondjant…
- Mamére, v’yez bî-n què ç’n’est nî-n l’ vré, èno ?
- Què ?
- C’èst nî-n l’ pètit Jésus qui passe lès cougnoles.
- Bî-n sifét èno, pouquè ?...
- Pace què si ç’astoût li, i don’roût l’ minme a tèrtous, i n’ din bar’roût nî-n dès gnognotes a lès Dodore.
- Way mès, yeûsses is sont branmint da!
- Vos m’avèz pourtant dit què c’ît lès poûves què l’ Bon Dieu vèyoût l’ pus vol’tî…
-I s’a potète trompè m’ colô, rèspond grand-pé, dins s’ tournéye, i fôt d’ja qu’ i voye râde pou passér tous costès.
D’aboûrd, mamére, coûpèz m’ pus grande in quate, ‘yèt portèz in morcha a chaque pètit Dodore… Vos vîrez què l’ pètit Jésus sèra binése què dj’é pinsè a fé ç’ qu’ il-avoût maleûreûs’mint roubliyî.

Trève

Èl bouchon pète, èl champagne spritche
dusqu’ ô plafond, èl cras fwa brotche
pa leûs narènes, lès carèsses vol’tè bas
pa d’sous l’ tâbe, lès promèsses vol’tè wôt
dins l’ fumiére dès cigâres èyèt
l’ brût dèl musique a la môde.

Su l’ tablô dèl bone consyince,
on dèsface lès missiles,
on scrit l’ pangn pou tèrtous èyèt
l’ pé pou mile ans.

C’èst ’ne vyèye tradicion d’lé lès peûpes civilisès…

Quand l’ piquète du djoû dèskeûdra l’ môvlète,
is rindront a lès t’weûs
leûs mitrayètes.

Mès pou l’ moumint, pou quéques-eûres,
c’èst Nowé !...

Môvlète: guimauve

Nowé d’ bribeû

L’ pètit Jésus èst dèskindu
Pagna volant, marone trowéye;
L’ pètit Jésus èst dèskindu
Avû dès cougnoles bî-n doréyes.
Dès cougnoles tout plin ’ne mande a bwéye;
L’ pètit Jésus èst deskindu
Avû dou boneûr pa brasséyes

I d-a r’wè pa tous lès costès,
Dè long-z-in lardje, t’t-avô l’ damâdje.
L’ pètit Jésus, l’ long dès pavès,
A radjon.ni tous lès visâdjes;
I n’a qu’ pour mi - c’èst bî-n damâdje
Què l’ pètit Jèsus n’a rî-n d’nè.

P’tit Jésus, ascoutèz m’ priyére…
Mès chabots sont ci, d’lé fèyére,
P’tit Jésus… dj’é d’dja tant soufri !...
R’wèz-mè lès crousses dè vo plési…
Dju n’ démande nî-n a fé bombance
Dju n’ dèmande foc ène pougnéye d’ chance
Pou r’fé m’ boneûr tout dèsdjarnè
Wétèz bî-n… r’tournèz vo musète,
Vos trouv’rèz co deûs twâs mîlètes…
- C’èst maleûreûs. Mès, què volèz ?
L’ pètit Jésus n’ m’a rî-n donè.

Haut de page

Conte pou l’ Nowé
Ernest Haucotte, Èl Mouchon d'Aunia dècimbe 1931
Trève
Christian Quinet, Èl Mouchon d’Aunia n° 1, 1999
Nowé d’ bribeû
Marcel Hecq, Èl Mouchon d’Aunia janvier 1927