Saint - Nicolas
Ô ! Grand Sint-Nicolas, patron d’ tous lès scolîs
C’èst m’ gout dou chocolat, quand du n’ dwa nî-n l’ payî
Du sû toudis bî-n sâdje a scole èy a m’ mèson
Du rèpète mès pâtèrs, sans jamès fé m’ mouzon.
Èl cî-n qu’ d’ in.me bî-n, c’èst dou Kwatta
Pace què m’ poupa travaye doûla
Mèrci, bon grand Sint Nicolas
Tra-la-la !
Èç tchanson ci, du l’ disoû d’dja, quand d’astoû p’tit !... Lès paroles què d’ tchantoû, come in bonace, du lès cwayoû ! Dou tans passè, Sint-Nicolas, ça n’astoût qu’ in vî boulome, qui trouvoût l’ moyî dè s’ introdwîre dins lès mésons in passant pa l’ tchèminéye sans fé d’ boucan, pou r’compinsér lès sâdjes-èfants, in leû m’tant deûs twâs bab’lutes, in-oranje su leû n-assiète avû téqu’fwas in p’tit jouwèt dèssu l’ costè. Dèvant dè r’montér pa yu ç’ qu’ il-astoût v’nu, i pèrdoût in saclot d’ pèlates pou l’ cî-n qui l’ ratindoût su l’ toût èt qui n’astoût qu’ in bia p’tit bôdèt portant ’ne manoke su s’ dos rimplîye d’ boubons èyèt toutes sortes dè paquèts.
L’ eûre d’ ôdjordû, Sint Nicolas èst dèv’nu in rupin. Il-a in bia costume, in wôt capia i n’ s’ amousse pus qu’ al fèrnièsse dès grands magasins. Lès dèplaç’mints, i lès fét in-èlicoptère. Quand on l’ pourmène dins n-in vilâdje ou bî-n dins ’ne vile, paréy qu’ in minîr, il-è-st-assis ou bî-n stampè dins ’ne bèle otomobile. A vîr tout ça, comint volèz qu’ in-èfant minme dè wit’ ans cwayisse co a ç’ bon vî sangn la ! Lès-èfants dè mèt’nant sont branmint pus malins què dè m’ djon.ne tans. Pou vos d’nér ’ne preûve qu’ il-a dou vré a ç’ què d’ vos di, du va vos contér in.ne istwâre qui s’a passè il-a deûs s’mènes, intrè in djambot d’ neuf ans èyèt s’ vièye nènène.
Come èl mére dou gamin vènoût d’ rintrér al matèrnitè pou ragrandi s’ famîye, èl bobone li dit insi: « Vo mouman m’ colô, èst voye p’in-avé in France pou rafèrmi s’ santè. Ô matin, èle m’a tèlèfonè pou savoû çu qu’ èle dèvoût vos raportér dè d’ lôvô pou vo Sint-Nicolas. Swat’ ène pètite seûr ou bî-n in p’tit fré come i n’ d-a pont d’ pus bia !
Mès… grand-mé, què li rèspond l’ futè gamin, du n’sû nî-n v’nu ô monde a Carniére. Môgrè m’n-âdje, du vwa clér’. Ène pètite seûr ou bî-n in p’tit fré, ça n’ mè dit rî-n dou tout… mès pusdit què vos m’ dèmandèz m’ gout, du va vos l’ dîre, mès ça, c’ è-st-intrè nous. Si m’ mouman vos tèlèfone co pou savoû què, a propôs dou cadô pou m’ Sint-Nicolas, dites li dè m’ pârt, qu’ in fré ou bî-n ‘ne pètite seûr què ça n’ mè dit rî-n dou tout, mès què si d’ astoû seûr dè n’ nî-n agravér s’ santè qu’ èle sougne… lôvô, què d’âroû mèyeû qu’ èle mè raport’roût in p’tit tch’fô !
Sint-Nicolas va v’ni a l’ èscole !
Mam’sèle Mârîye l’a bî-n promis a lès-èfants. S’ is sont bî-n sâdjes, i dèskind’ra dou Paradis pou v’ni l’ s-ès vîr après l’ rècrèyâcion.
Èl’ grosse cloke vî-nt d’ sounér ! C’ èst bî-n seûr li qu’ arîve !
I n’ a pus rî-n qui boûdje dins l’ pètite classe. Lès-arsouyes, lès pus rouyants dèl binde sont pus sâdjes què lès-imâdjes aclapéyes ô mur.
On n’ intind pus rî-n. Nî-n minme èl ramadjâdje dès masintches qui tchip’tin’tè su l’ baronî-n, ni minme lès coûps d’ mayèt dou mènusiè qu’ a bèrzouyî bî-n lômint t’t-aleûr pou rabistokî l’ uch dèl coûr.
Potète què lès mouchons èt l’ mènusiè ont coureû vîr Sint-Nicolas ètou !...
Mam’sèle Mârîye fét dalér s’ clakwâr. Lès brokgnoles, stampès t’t-ôssi râde, n’ ont co rî-n vu, mès is s’ ont mis a tchantér tèrtous inchène: « ô Grand Saint-Nicolas, Patron des écoliers… » èt il èst rintrè…
Qu’ il èst bia ! Il a ‘ne bèle cote dè toutes lès sortes dès couleûrs, avû dès ribans dorès come dou papî d’ chocolat. Il-a in wôt roûdje capia mouch’tè d’ bleû, èt co dès ribans èt co dou minoû. Mès çou qui èst bia, surtout, c’èst s’ grande barbe toute blanke èt si spèse, si doûce qu’ on djur’roût dèl wate.
In tout s’ asplouyant su s’ long baston avû ’ne crole ô d’bout, il-a passè asto d’ yeûss’, èt i leû pâle d’ ène vwas si doûce èt si bone, ène vwas qui r’chène in pô èl ciène dou mènusiè qui travayoût dins l’ coûr, mès qui èst co bî-n pus tinre què l’ siène !
I leû d’mande s’ is s’ront sâdjes, s’ is lyi promèt’tè d’ bî-n travayî, èt come il-a co branmint dès places a fé, i lès fét passér a l’ afiléye pou lyeû donér saquants boubons tout in lyeû d’mandant çou qu’ is voûrin’tè bî-n pou l’ grand djoû dèl fièsse.
Yun, c’è-st-in bia tch’fô, l’ ôte, c’èst ’ne poupéye qui doûrt ; Sint-Nicolas promèt tout, a condicion qu’ on fuchisse sâdje bî-n intindu.
C’èst quasi tout, i n’a pus qu’ in browère qui dwat passér. C’èst l’ pètit Milo. On dîroût qu’ i trimbèle tout-in pèrdant lès boubons què l’ Sint lyi tind, èt pourtant, c’èst d’ ène vwas bî-n clére qu’ i dit: « Mi, Sint-Nicolas, çou què d’ voûroû bî-n, c’è-st-in grand bon Dieu ».
In grand Bon Dieu, m’ colô ? Pou què fé ?
C’èst pou mète su l’ fosse dè m’ fré. D’é stè al cèmintiére èl djoû du Toussangn avû m’ mouman, èt d’ l’ é vu d’bôchéye pace qu’i n’avoût pont d’ cwas su s’ fosse.
***
Sint-Nicolas n’ a rî-n dit, mès in vûdant d’ l’ èscole, il-a fét ’ne carèsse su l’ machèle dou gamin, èt on-âroût tout dit qu’ il -avoût lès larmes as-îs.
Èl pètit Milo n’ d-a nî-n mouf’tè a s’ méson, il-a seûl’mint d’mandè a s’ mouman pou dalér al cèmintiére èl djoû dou Sint-Nicolas.
Pou l’ contintér, èle s’ inva avû li dîre in pâtèr pou s’ pètit Lowis qui fét s’ dèrnî-n some ô d’bout d’ ène voyète.
Milo n’ pâle pus. I voûroût couri pou dalér pus râde, èt pourtant on dîroût tout qu’ il-a ’ne saquè qui l’ rastî-nt C’è-st-a pène s’ il-a dit bondjoû a in-ome qu’ is vièn’tè d’ rincontrér a l’ intréye. I l’ counwat bî-n pourtant, c’ èst l’ mènusiè qui travaye dèspûs ô mwins quinje djoûs a l’ èscole dès mam’sèles.
Milo avance tout stoumakî. Tanincoûp, su l’ tombe què s’ mouman ravîse fin sésîye, èl bèle cwas d’ bos toute nwève qu’ èst stampéye su l’ fosse dè s’ Lowis, èl gamin tchét a gu’gnous, èyèt sès mangn’s jwintes, i s’ mèt a tchantér dè toutes lès forces dè s’ pètit keûr : « Ô Grand Sint-Nicolas … »
Vos dirèz tout ç’ què vos voûrèz, Charlote, mès lès parints n’ont pus pont d’ plési ô Sint-Nicolas.
Èyèt ça pouquè, on, Zidore ?
Pouquè ?... Pace què lès-èfants sont malins trop djon.nes.
Ba ! Zidore, vos-astèz co ô vî tans, vous ; vos voûrîz qu’ no gamin d’ sèt’ ans n’ sâroût nî-n co lîre ?
Vî tans tant qu’ vos voûrèz ; lîre, siyè i put bî-n savoû lîre. Mès ravisèz lès vitrines èyèt lès fernièsses dès boutiques èt dès boutiquias : vos n’ vèyèz qu’ dès-afères dè Sint-Nicolas a moute, èyèt leûs pris son afichîs avû dès chifes d’ in quartî d’ wôt.
Què volèz ?... c’èst l’ comèrce…
Tout djusse… mès c’èst l’ comèrce qui brâde tout. Comint voûrîz qu’ lès-èfants cwârin’tè co al bone farce qui lès rindoût si binéses èyèt nous-ôtes, lès parints, si contints d’ leû binés’tè, ô matin d’ Sint-Nicolas ? Il-in sav’tè pus qu’ nous.
Bawit’ Zidore !... no p’tit Jules èn’ sét co rî-n dou tout.
Vos l’ pinsèz ?... Èyèt l’ pètite Janète dou Tchat, qui n’ a qu’ chîs-ans èt d’mi ?
Èle n-in sét nî-n pus qu’ no Jules.
È bî-n, vos-astèz bî-n trompéye la d’ssus. Èyèt pou vos l’ prouvér v’la ç’ què dj’é intindu d’vant l’ vitrine dou Sarma ayér’ al breune, come dju lès rincontroû, ès’ mére èyèt li :
Mouman, èl grande poupéye dè quarante francs, s’ra pour mi ?
Non, m’ pètite, c’èst trop kèr’ pour nous.
S’ra pou qui d’aboûrd ?
Potète pou l’ fîye dou Mayeûr.
Èle èst pus sâdje què mi, Mouman, èl fîye dou Mayeûr ?
Non, m’ pètite, mès èle èst pus riche.
D’abourd, Mouman, Sint-Nicolas i fét lès grandès poupéyes pou lès riches èyèt lès p’tites pou lès-ôtes ?
Way èm pètite.
D’aboûrd Sint-Nicolas ç’t-in mèchant !
Si vos dites co ça, i n’ pass’ra rî-n dou tout, savèz !
Mès pouquè ç’ què Sint-Nicolas fét payî sès poupéyes, dites, Mouman ?
Pace què c’ èst dès-ouvrîs èyèt dès feumes qui lès fés’tè.
Èyèt Sint-Nicolas, i leû paye ?
Non, m’ pètite.
D’abourd, Sint-Nicolas, i n’ fét rî-n, li ?
Sifét, i lès passe, li.
È bî-n si Sint-Nicolas passe lès bèlès poupéyes pou lès liârds, dju n’ s’ré pus sâdje, la tè !
Siyè, m’ pètite, i fôt yèsse sâdje pou vo poupa èt vo mouman.
Èno, Mouman, què Sint-Nicolas c’èst m’ Poupa ?
A ç’ moumint la, èl pètit Jules rinte èy i dit :
Way c’èst vous, Poupa ; c’è-st-ô Sarma qu’ vos-avîz yeû m’ kèvô, l’ anéye passéye.
Lès deûs djins ont d’morè paf. Sarma avoût t’wè Sint-Nicolas èyèt tout leû plési.
« Balâde d’ ène kène a s’ pètit fré, l’ èrculot, pou l’ invouyî couchî. »
V’la Sint-
Ascoutèz !... V’la Sint-
Dèspéchèz vous, fré, il èst la,
Il-
I dèskind pa l’ grande kèminéye…
Pou mi, il èst bî-
I dèskind pa l’ grande kèminéye…
Dèspéchèz vous, Fré, il èst la…
S’ i vwat qu’ nos-
Pus râde què d’ avoû dès-
Il-
Couron’ râd’mint dins no p’tit lit,
Il-
Ascoutèz !... V’la Sint-
Qu’on pût tchantér su l’ èr’: « Dors mon petit Jumbo ».
Bèrceûse dèl vèye
Sint-
I
Dôdo no p’tit Colô
indormèz vous, fètes ène bone nût’
dins vos p’tit lit bî-
Dormèz m’ pètit chéri
Sint-
fètes dôdô, no p’tit Colô
II
Insclumèz vous m’ chéri
abîy alzin come in.ne arondje
al moute du paradis
ravisér lès bias djeus d’ vos sondjes.
C’èst pour vous lès pus bias:
èl gugusse, èl polichinèle,
l’ ours, èl bale èyèt l’ tchat
èyèt co l’ vré trin qui chufèle…
Dôdo, fètes dôdô
fètes dôdô, no p’tit Colô.
III
Rèvèz d’ in viyolon
d’ in tamboûr ou bî-
Pace què cès machins la
ont toudis provoquî dès guères.
Quand-
Dôdô, fètes dôdô
fètes dôdô, no p’tit Colô.
Sint-Nicolas
Oscar Godefroid,
Pour Li…
Marius Roch,
Dèvise su l’ Sint-Nicolas.
Flori Deprêtre, Èl Mouchon d’Aunia, décembre 1938
V’la Sint-Nicolas
Marcel Meulemans,
Bèrceûse dèl vèye Sint-Nicolas
Fèlixia Wart-Blondiau ,
Pour Li…
Marius Roch,
Dèvise su l’ Sint-
V’la Sint-
Bèrceûse dèl vèye Sint-